معصم من تصميمي

السلام عليكم ورحمه الله وبركاته

معصم من تصميمي
الموديل 3





خفيف وسهل وسريع جدا ومش بياخد وقت
تقدرى تشكليه زى ما انتى عاوزه
ممكن تعمليه ساده او تزودى ورود او دواير على زوقك

تابعوا الورشه يا قمرات

ورشه المعصم

عمل سلسله ونقفلها بمنزلقه وندخلها في ايدينا نتاكد انها دخلت بسهوله مثل الغويشه ومتكونش واسعه يدوبك تدخل يعنى


نطلع بعواميد فوق كل سلسله


نعمل 3 عمود و3 غرزه تانيه ودى باترونها للتعلم
ودى بنستخدمها في الكنرات بتاعت الشرابات والبلوفرات وممكن تستخدم في الكوفيات لانها عامله زى الاستك
اسم الغرزه دى الغرزه المطاطيه او الغرزه الاماميه
ده الفيديو التعليمى بتاعها
https://www.youtube.com/watch?v=OF6nLbgWUvw








بعد لما توصلي لبدايه الصباع الكبير بتزودى غرزه من ناحيته
انا زودتها في الصف التاسع
الصف اللى بعده عادى مش هتزودى
ولا اللى بعده

تابعونى

نكمل يا قمرات

احنا قلنا هنزود من عند الصباع الكبير في الصف التاسع تمام
دى صوره الغرزه الزياده شوفتى منين من عند او غرزه بتعمليها اللى بتطلعى فيها ال 3 سلاسل الارتفاع


واللى بعده عادى بعد كده اللى بعده انا زودت بردو واحده
وبعد كده هنيجي عند الصف ال12 وهنفصل يعنى هتطلعى سلسله وتعملى الصف لغايه الاخر لكن مش هتقفليه بمنزلقه
هتطلعى 3 سلاسل الارتفاع وتعملى الصف ال 13 وتلفي داير ميدور تانى وهكذا
عشان دى هتعمل الفتحه اللى بندخل منها صباعنا

شوفتى الفرقه بقيت بتبدا ازاى في الصوره

طيب الغرزه مش كلها واحده يعنى مش كلها عواميد
العواميد هنعمل فوقها عواميد طيب وال 3 التانين عشان نحافظ على نفس الشكل بنعمل العكس
ازاى

انتى كنتى بتخدى لفه خيط وتروحى داخله بالابره من تحت العمود يعنى بتاخدى العمود كله على الابره وبتلفي وراه صح
لا المره دى هتوحى جايه من ناحيه بره الشغل من بره يعنى وتروحى مدخل الابره من جوه العمود يعنى بدل ما العمود كان هو اللى على الابره
لا المره دى الابره هى اللى على العمود هتشوفيها قدامك
زى كده

زى الصوره
الغرزه اللى كنا بنعملها اسمها اماميه او المطاطيه
الوقتى هنعمل فوقها الغرزه الخلفيه عشان لفينا الصف ده بالنسبه للصف ال 13 لكن في ال 14 هنرجع عادى
يعنى هتعملى 3 عواميد +3 غرزه خلفيه في الصف ال 13 والصف ال 15 فقط

كده هتجربي على ايدك لو لقيتى صباعك داخل مستريح هتقفلى الصف ال 15 اخره بمنزلقه يعنى هتبداى ال 16 عادى خالص دوران عادى

بس انا طلعت بعدها 3 صفوف ال 16 و ال 17 وال 18 بس
وعملت بعدها باللون البرتقالى غرزه الحشو من فوق وتحت


ده باترون الاماميه والخلفيه


وده فيديو للاماميه والخلفيه

https://www.youtube.com/watch?v=OF6nLbgWUvw
بكده اكون خلصت جسم المعصم والتزويق ده على زوقك


تابعونى

التزويق بتاعى

انى عملت سلسله برتقالى بطول المعصم وطلعت عليها بصف واحد من العواميد
وخيطها بسراجه عاديه
ورحت ماشيه عليها بكروسات من الخيط البنفسجي بالشكل اللى انا حاباه

ودى النتيجه




انتى ممكن تزوقيه انك ممكن تعملى ورده صغيره على الجنب
او تعملى كنر من تحت بعد غرزه الحشو باللون البنفسجى زى دى

از ممكن تعمليه كله عواميد بدون اماميه ولا خلفيه
بس هتبقي بنفس الطريقه


مع تحياتى بورشه ممتعه وموفقه ان شاء الله

بصى ياهبه انا عامله واحد بس مش نفس الغرزه شوفى كدا وقوليلى رايك

جميل اوى اوى
مش مشكله يبقي نفس الغرزه
هما كلهم نفس الطريقه
بس اللى انتى عاملاه حلو بس الجزء اللى تحت مش عاجبنى
ممكن هو هو بسس تزوقيه اكتر يعنى تعملى مثلا شريط ستان

بجد انتى انسانة ملاك وربنا يديكى الصحة والعافية وراحة البال

 

 

الله ينور